由內至外消滅暗粒/閉口

翻到香港之後，暗瘡係消得七七八八，但開始出暗粒/閉口(google search 閉口 豆瓣會搵到好多詳盡資料)。右邊臉頰生左起碼十粒，唉，我唔想爛面啊。唔知點解，眼底又開始爆乾紋，之前每邊都係得一兩條，依家有半個月內出左一堆。
-------------------------------------------------------------------------------------------------------------------------

治療－外

有兩個方法

1. 靠用護膚品
點做：濕敷保濕爽膚水、用含有BHA嘅產品、做好保濕（最好用gel狀）
好處：留印機會低
壞處：需要有耐性，因為起碼要1個月

2. 用針清
點做：自己挑（要注意挑完要敷消炎水，咁就唔會由暗粒變暗瘡） 或者 去美容院挑。

注意事項：用針清完之後一定要敷消炎水。

之前手痕，見到啲暗粒真係好礙眼，於是自己用呢啲針禁佢出嚟，冇敷消炎水，第二日暗粒就成功變暗瘡...然後成功地留印。

好處：快
壞處：可能會留印，留印之後要等一段時間消印

我點做？

一開始我係諗住靠用第一個方法，但因為我真係冇咩耐性，過左半個月之後忍唔住自己挑曬。依家用緊去印產品，睇下啲印幾耐會消。遲啲會更新最新狀況。
-------------------------------------------------------------------------------------------------------------------------

預防－外

1. 盡量避免用含有油份嘅產品（無論係礦物油定其他植物油如jojoba oil）

我好少生暗粒，但今次一生就生成十幾粒，諗翻起個罪魁禍首應該係有油份嘅護膚品。之前以為自己皮膚乾(dry)，於是不停用ORIGINS Drink Up Intensive Overnight Mask。其他護膚品冇轉到（全部都係冇油份(oil-free)）。

之後先知我地成日話皮膚乾，其實係再仔細分兩種狀況，一種係乾(dry)，一種係缺水(dehydrated)。前者要用啲有油份嘅護膚品，後者就要補水。而我自己係缺水，但係就走左去補充油份，結果就生暗粒。

內乾外油皮膚係大部分係缺水，所以要補水而且遠離油份，否則易生暗粒暗瘡。

我依家用緊啲oil-free產品，遲啲會出Reviews。( 

Reviews- Oil-Free Moisturizer 無油潤膚露

)

2. 補水

補水－外：濕敷爽膚水5分鐘。要注意係保濕型嘅爽膚水先可以用嚟濕敷，如果係清潔型，如CLINIQUE Clarifying lotion就千奇唔好用嚟敷臉。

之前見到好多人用ALBION Skin Conditioner （又稱健康水，因為可以令肌膚回復健康）去暗粒，於是就入手左一支(hkd480)。每晚用Clarisonic Mia 2 洗完面之後，將健康水倒落化妝棉，濕敷3-5分鐘。如是者，用左一個星期，暗粒唔但止冇少到，仲多左兩粒。

都係用翻廣源良菜瓜水(hkd25)，點知敷左4次之後暗粒已經謝左好多。

補水－內：多飲無花果水、多食雪耳。兩種食材都係性平，寒底燥底都應該可以食。但如果有咩唔舒服，要即刻停。

我依家每日都食一碗雪耳。等我試下個效果先，遲啲會加埋食譜。

3. 做好清潔

(a) 每晚要仔細卸妝同潔面。

落完妝之後我會清潔型爽膚水二次清潔，依家用緊CLINIQUE Clarifying Lotion Type 2同PAULA'S CHOICE Resist Toner，呢兩隻都有酒精，但係酒精係呢個步驟係關鍵成分，因為酒精係有機溶劑，所以可以幫助去除殘留嘅化妝品。敏感皮膚要特別小心，如果有任何不適要停止。

如果有用到防水嘅防曬，記住用卸妝產品落。之前我試過用SHISEIDO Urban Environment UV Protection Cream，PA話可以就咁用洗面奶洗走佢。但我發現淨係用洗面奶會生暗粒。

(b) 每星期用一次清潔面膜

市面上有好多唔同牌子嘅清潔面膜，但我用開ORIGINS Clear Improvement Active Charcoal Mask，用嘅時候記得避開眼周皮膚。

其實一早買左翻嚟，但一直懶得用，直到果日睇itsjudyslife見到judy都有用，就抽起條筋用下佢。用完之後，皮膚感覺好乾淨，有一兩粒暗粒裡面嘅污糟野自己標左出嚟。不過我覺得呢枝mask主要都係用嚟預防，等啲暗粒好翻之後，都要每星期用一次。

4. 盡量避免用手摸面

手有好多菌

5. 定期消毒電話

其實手提電話有好多細菌。我地平時出街又帶住佢去廁所又帶住佢，又將佢周圍擺。聽電話嘅時候，塊面就會掂到好多菌。我每晚都會用酒精消毒電話：用紙巾濕少少消毒酒精，抹下部電話。

--------------------------------------------------------------------------------------------------------------------------

重中之重：預防－內 (16/5/2016更新) 

由2016年1月出暗粒開始就跟住以上方法（預防－外）做，雖然出暗粒嘅數目少左好多，但係都仲會有幾粒。咁岩呢排又經痛，就去左睇中醫。食完中藥之後皮膚好左好多。然後我醒覺到護膚最緊要係由內入手，我身邊總有啲朋友冇咩搽護膚品，但係皮膚白裡透紅（我之前都係咁），原因係佢地體質好。

諗翻起呢大半年嘅爛面經歷，罪魁禍首係夜訓同壓力大。呢兩樣因素加埋會導致肝鬱氣滯，而肝鬱氣滯體質有以下症狀：黑眼圈、面色暗黃、經痛、生暗粒。所以呢，最緊要心情愉快、盡量12點前上床訓教（我知好難同好老土，但係呢兩樣真係好有用）。之前用左好多錢買護膚品，皮膚只係越嚟越差；開始睇中醫、早睡早起、飲多啲湯同水之後即刻暗瘡byebye。

但要留意中醫「功力」比較參差，勁嘅真係好神（我之前醫好左經痛、鼻敏感、暗瘡、出面油），差嘅可以好差（之前睇左個中醫醫經痛，點知睇完仲嚴重左）。

(26/6/2016 更新)：呢排得閒啲，進行緊救救爛面大行動。詳情如下：每日最少2份生果、早餐食得健康、一個星期最少做5次運動、食得清淡、飲多啲湯水、睇中醫調理身體。如是者進行左1個月，啲暗粒已經消曬，仲有效過靠護膚品。 

--------------------------------------------------------------------------------------------------------------------------

最近嘅護膚程序 My Current Skin Care Routine to Unclog My Pores (由15/2/2016 －3/3/2016冇耐性直接用左方法2)

早

1) FRESH Soy Face Cleanser：溫和潔面

2) 廣源良菜瓜水：補水

3) PAULA'S CHOICE Skin Perfecting 1% BHA Lotion Exfoliant：去角質、滲入毛孔溶解粉刺、抗菌預防暗瘡

4) FRESH Black Tea Age-Delay Eye Concentrate: 保濕預防細紋

5) PAULA'S CHOICE Moisture Boost Hydrating Treatment Cream：滋潤修護

6) ELTA MD SPF 46 UV Clear：防曬

晚

1) FRESH Soy Face Cleanser：溫和潔面

2) 廣源良菜瓜水：補水 （濕敷3-5分鐘）

3) PAULA'S CHOICE Skin Perfecting 1% BHA Lotion Exfoliant：去角質、滲入毛孔溶解粉刺、抗菌預防暗瘡

4) ESTEE LAUDER Advanced Night Repair Eye Serum：滋潤修護

5) PAULA'S CHOICE Resist Ultra-light Super Antioxidant Concentrate Serum：保濕去印

6) ESTEE LAUDER Advanced Night Repair Eye：滋潤修護

7) PAULA'S CHOICE Moisture Boost Hydrating Treatment Cream：滋潤修護 （我依家先醒起呢個係有油架，唔好用啊）

我嘅膚質

混合偏乾：T-zone 外油內乾、兩頰偏乾、眼底極乾、容易生粉刺黑頭暗粒、容易留暗瘡印

-------------------------------------------------------------------------------------------------------------------------

呢啲都係我嘅經驗之談，並非專業意見，只供參考。如有錯漏，歡迎指正。

Disclaimer: This is NOT sponsored by any brands. All the products mentioned were purchased by myself. 

所有產品均為自購。以上意見並非有意爲任何品牌作宣傳之效。